عاوز تحب ؟ فكر معانا الاول

بسم الله الرحمن الرحيم

عاوز تحب...عارف .. و أكيد تتحب طبعا .. ده يبقى يوم المنى... لكن قبل ما تاخد الخطوة الجريئة دى يا ريت تستخلص من وقتك دقيقتين و تفكر فى كام نقطة الاول.

شوف يا سيدى هو شىء جميل انك تحب و تتحب لكن الموضوع مايكونش لمجرد الرغبة فى الحب و الحب فقط و مايكونش عشان عندك شوية حنان زيادة و كمية عواطف انت حابسها و عاوزة تخرج يبقى تنطلق و تقول انا خلاص قررت أحب...و تبدأ تدور فى اللى حواليك و تفحص...ممممممم ...يا ترى ين فيهم تنفع تكون حبيبة قلبى... ؟؟ مين تستحق انى اديها الحنية و الكلام الحلو اللى ماقلتوش لاى حد لغاية دلوقتى... ؟؟ و تبدأ تختار بقى ..



و عملية الاختيار دى بتختلف من شخص للتانى و طبيعى بتختلف حسب الموجود حواليك ..مانتا قفلت الرؤية عاللى حواليك بس عشان ده المتاح دلوقتى بقى و انت عارفه كويس و ادامك كل يوم...سواء فى الجامعة او من بنات الجيران او النادى لو فيه نادى بتروحه او من اللى بتشوفهم فى الشارع و ده لو قلبك واسع اوى يعنى و كمية الفراغ فى حياتك غير مسبوقة...

عموما انت عشان تختار بتحدد مواصفاتك المفضلة الاول عشان اللى هتختارها لازم تبقى ممتازة من الناحية اللى بتعجبك... ممكن تختار اكتر بنت شيك فى اللى حواليك بس تكون بشرتها بيضاء عشان انت مش بتحب الغوامق ..او اكتر واحدة مثقفة بس ماتكونش بنضارة عشان ماتغيرش لعدسات و تشوفك كويس و تغير رايها فيك بعد النظر ما يرجع.. او اكتر واحدة هادية و مش معروفة اوى يعنى و ده عشان تبقى فى السليم بردوبس بشرط يكون قوامها رياضى ..او اكتر واحدة مرحة و دمها خفيف و متحدثة لبقة عشان انت عكس كده و الاقطاب المتضادة بتتجاذب طبعا و دى قاعدة علمية معروفة...


و فيه ناس بتختار اكتر بنت متدينة ..اه و الله بيختار المتدينة عشان يحاول يعيش معاها قصة حب و بتحصل كتير و ده طبعا عشان تبقى بالنسباله مضمونة و تبقى انت الاول فى حياتها و تقنع نفسك انك نوعا ما مش هتبقى بتعمل حاجة حرام و ده عشان انت مش بتفوت فرض اهو و هى ما شاء الله لبس محترم و حجاب كله التزام و مش بعيد تشدك نغمة موبايلها اللى فيها مقطوعة دينية .. اهو هو ده الالتزام و انت كده يا زين ما اخترت بقى...يبقى اكيد علاقتكم مش هتتعدى حدودها لأنكم المفروض ملتزمين و ممكن و احتمال تكمل معاها و تبقى شريكة العمر...و ده هياخدنا لنقطة مهمة جدا و هى الغرض من العلاقة أصلا...


ايه غرضك من العلاقة؟؟؟ هل غرضك هو تجربة للحب و تطبيق عملى لكل القصص الرومانسية اللى قرأتها فى السنين اللى فاتت؟؟... و لا الغرض انك عاوز وجود انثوى فى حياتك اللى الحمد لله ناشفة و زى الخشب و محتاجة واحدة تكون الحتة الطرية على رأى الممثل اللى بحاول افتكر اسمه و مش فاكره دلوقتى خالص؟؟... ولا انت من النوع المكتئب اللى مبتعد و منطوى عن اللى حواليك و محتاج حد يسمعك و تفضفضله براحتك بعيد عن عيون كل الناس و تبقى ليك خلوتك مع النص الحلو اللى تقدر فيها تفضفض و تقول اسرارك اللى مش لاقى حد تقولهاله؟؟ ... انا عاوزك تاخد بالك بقى من المثالين اللى جايين دول و ركزلى فيهم ....ولا انت بقى بتقنع نفسك انك مش هتتجوز الا لما تعيش قصة حب الاول و أهو غرضك شريف أهو و النهاية هتبقى خير بس هى تيجى و توريك انها بتحبك الاول عشان تقتنع و تحبها انت كمان و تتجوزها ( شوف التتابع اللى مالوش مثيل) ...؟؟؟ و لا انت بقى من النوع الصريح اللى مش بيضحك على نفسه او على البنت اللى هتتعرف عليها بأن الموضوع حب و جواز و كده انما انت هتكون صريح معاها من الاول ان انا أحبك أه .. انما أتجوزك ؟؟ أهو ده اللى مش ممكن أبدا و الموضوع كله بوى فريند و جيرل فريند و تكملة لديكور شبابى موجود فى أجزاء من واقع حياتنا دلوقتى ان كل ولد او بنت لازم يكونوا مصاحبين و الموضوع بعيد عن الجواز و الكلام العربى القديم ده طبعا يعنى و عشان ما يبقاش فيه خداع و صدمات و كده فالنقطة دى هتبقى واضحة و صريحة من الاول ان الغرض مش الجواز..و يا سلام عالصراحة اللى اعتقد مش هتبقى راحة فى المرة دى...


طيب عموما نفترض انك حددت غرضك و حددت مواصفات الطرف التانى...يتبقى بقى التنفيذ و دى اصعب نقطة بقى..قولتلى ليه.؟؟..أقولك ليه..عشان كذا سبب منهم ان البنت نفسها ممكن تكون عندها نفس الفراغ و بتسعى لنفس الغرض و محددة مواصفات الولد المفضلة ليها بس للاسف تطلع انت مش فيك المواصفات دى و من هنا تيجى الصدمة و يبدأ جزء معين مما تنفقه يصبح مخصص لشراء البومات الاغانى الحزينة او جزء معين من كونكشن الانترنت عندك مخصص لتحميل نفس نوعية الاغانى و تبدأ توحش المخدة بتاعتك لانك مش بتنام و سهران دايما و يا عينى لو كنت مدخن ..هتتصاعف الكمية اللى بتدخنها يوميا و صاحب كشك السجاير يقولك صحتك يابنى انت بقيت حريقة كده ليه (قال يعنى مكنتش حريقة الاول و هو خايف عليك اوى)...

تانى سبب بقى ممكن تكون حددت الغرض و المواصفات بس البنت نفسهااللى بالمواصفات دى مش موجودة حواليك و كلهم بمواصفات أقل للأسف و من هنا تبدأ تتجه لمدرسة الواقعية و هى الرضا بالامر الواقع و جود بالموجود و الموجود يسد (مع الاعتذار لرواد المدرسة لأن كلامى بعيد كل البعد عن مبادئها طبعا) ..المهم انك هتتنازل و تبدأ تدور على أقرب واحدة للمواصفات دى و تفضل تدور و تتنازل و تدور اكتر و تتنازل اكتر و ممكن توصل الى انك تختار واحدة مافيهاش الا صفة واحدة من المواصفات دى و باقى العشرين صفة البقاء لله فيهم بقى....

تالت سبب انك تيجى تنفذ قرارك و تختار البنت اللى لاقت اعلى الدرجات و احسن الوحشين فى اللى حواليك و تتفاجىء بأنها بالفعل زيك و بتفكر بنفس الطريقة لكن للاسف نفذت الفكرة قبلك و بقالها سنتين بتنفذ - قصدى مرتبطة..مش ارتباط رسمى طبعا ...و ساعتها مش هتتصدم ولا حاجةماتخافش...انت بس هترتاح و هتحس انك عملت اللى عليك و هتنساها اسرع من سرعة تطاير الكحول الايثيلى او السبرتو يعنى فى ليلة شتاء باردة

...
رابع سبب بقى و ركز معايا فى اللى جاى كويس اوى...انك بعد ما اخترت بنت فيها كل المواصفات دى و مطابقة لكل المقاييس و مواصفات الجودة اللى انت حدددتها و استوفت كل الشروط و البنود ...تيجى عند التنفيذ و سبحان الله تلاقيها بنت عاقلة و متحكمة فى صندوق الاحاسيس اللى عندها ده و اللى هو عندك بردو و مش عاوزة تغضب ربنا ولا عاوزة تغلط غلطة زى دى من ورا أهلها و لا هتضحك على نفسها و عليك و تقول انها قصة حب شريفة و مالهاش اى غرض دنىء و نهايتها الزواج ..مش هتكدب على روحها بالكلام ده لان مجرد كلامها معاك يعتبر شىء بالنسبالها محرم و عاوزة اول واحد تفتح له قلبها يكون الشخص اللىدخل البيت من بابه و شافها اغلى و اعلى قيمة من انها تكون ليها علاقة بيه بعيد عن عيون الناس بدل ما تغلط و تتصدم و تتجرح و تيجى بعد كده تقول يا ريتنى استنيت و ما استسلمتش لنزوة و مشاعر صح راحت فى الاتجاه الغلط و ضيعتها بايدى ..

ساعتها بقى هتتصدم فعلا و هيحصلك حاجة من اتنين يا اماهتعقل و تعرف الصح و ممكن فعلا البنت دى تكون هى اللى هتصمم عليها و تديها كل الحاجت اللى انت محوشها للى تستاهل بس ساعتها اللى تستاهل دى هتكون شريكة حياتك و فى اطار اعلى مكانة و اشرف بكتير من اللى كنت بتفكر فيه الاول ... يا اما هتهرب من التفكير فى معنى كلامها ده و هتقول انا شكلى اخترت غلط و دى واحدة مالهاش فى الرومانسية و تبدأ ترجع تانى تدور عاللى كنت بتدور عليه و تسرح فى ملكوت الهوى و تمشى تدلل على قلبك و تغنى و تقولزى ما البشمهندش منير ما قال : حد عاوز قلب فاضى ...قلب طيب قلب هادى ...قلبكله حنان و عطف ..يخطفك م الحزن خطف...مستعد يحب حتى قلب عايز ينسى ماضى !!!...و ساعتها هتبقى انت اللى اخترت و لا تلومنّ الا نفسك و عموما مش هتندم كتير على اللى ضاع منك لان اللى هيضيع منك وقتها هيبقى حاجة انت ماجربتهاش قبل كده عشان تزعل و تندم عليها و السبب انك ماقدرتش تستنى على ما ييجى اوانها .


تم بحمد الله....